基本需要

人有好多基本需要，諸如肚餓要食野，口渴要飲水，急要去解決等，對我來說，頭髮長就去剪，都係基本需要。
由細到大，都唔鍾意去剪髮，唔知點解，總覺得要坐定定成個鐘唔郁得，個頭俾人舞來舞去，並不好受。因此俾阿媽催促我去剪髮係細個時經常發生既事。到左大個，阿媽雖然唔會再催促我去剪髮，但每次去到salon，都會俾髮型師話我點解咁長頭髮都唔來剪。
計一計，原來我平均一年只係會剪三至四次髮，其實我都嫌多，不過頭髮長到遮住對眼同對耳，又真係幾唔舒服，唯有去剪。記得多年前興過一輪三上頭，個個男仔D頭髮長到痴，不過我在此聲明我從來冇扮過三上頭，反而係大學時就真係試過頭髮好長都唔去剪，俾人話我扮鄭杯麵。
對於一個唔鐘意剪髮既人來說，要佢去salon坐幾粒鐘電髮直髮染髮焗油等等行為，可謂天荒夜談，不過我曾經係半推半就既情況之下，試過一次染髮。
去salon洗剪吹係基本消費，D髮型師最鍾意一邊幫你剪髮，一邊遊說你做埋其他treatment同服務，果次就係俾個狡猾髮型師睇到我一頭白髮，係咁鼓勵同規勸我染髮，就係咁，我就俾左第一次佢喇。好記得染頭時佢將D顏料塗係我頭上面果種痛，同坐係度唔郁得果種苦，即使染完後真係靚仔左，但都係唔好再搞我喇。
有人好鍾意剪髮時同髮型師傾計，但我就麻麻喇，同佢唔係好熟，根本冇咩想講。最怕佢地次次都問你今次想點剪，大佬呀，我知我想點剪我就自己剪啦，就係想你用你既專業知識同我剪得好好睇睇嘛，你又問番我。所以我通想都係話剪短D囉，咁佢地就會自然幫我諗埋落去。
今日剛剛剪左頭髮，真係好喇，又可以等多三個月先需要再去剪......