下水禮

上星期日，終於舉行了本年度的下水儀式。

由細到大都係一個驚水既人，唔知係咪舊時曾經被浸親，如果唔係點解會無啦啦驚水先得架？所以到左今時今日，仍然未正正式式學識游水。正正式式既意思係一個唔好彩跌左落海， 應該識得游番上岸，而我......我諗應該兇多吉少。

記得細過一直都唔會去泳池同海灘，驚水嘛，直到中一二既時候，體育堂硬性規定要學游水，我果時其實好驚架，好彩學校有浮板供應，咁拿住塊浮板只係踢腳都免強應付到，但係一叫我放手我就會覺得好冇安全感，個人就會驚，愈驚就愈沉，愈沉就愈驚，所以雖然學左十幾堂，但係我仍然要拎實塊浮板先至識得游水，其實咁樣都唔叫識游水啦呵。

正因為我唔識游水又驚水既關係，係中學同大學都從來冇去過游水/玩水，失去左好多和女同學嬉水既機會，而家諗番都真係好唔抵.......

直至畢業果年暑假，幾個同學都搵唔到野做，唔知邊個無啦啦話不如去游水啦，咁我心諗咁大個人都要試下架，佢地又話肯教我，咁咪膽粗粗跟埋一齊去游囉。就係咁，果年夏天成日去泳池，慢慢就學識係一個企起身掂到池底既泳池到游水喇。至於要我去大池，即係成兩米深個d大池，我依然係唔夠膽游出公池，因為一去到我企起身掂唔到池底既地方，我又會驚沉，愈驚就愈沉，愈沉就愈驚。所以到呢一刻嚴格黎講，我依然係個唔可以出海游水既人，大海汒汒......

唉...其實都好想學識游出公海，起碼識多樣求生技能先哎......