冇所謂

有日行商場搭lift，係lift入面除左我之外，重有兩個十幾歲的少年，個樣十足十我當年讀書時果d 戇居樣。係搭lift落大堂期間，戇A就話：「喂，等陣去邊呀你？」戇B答：「冇呀，打算返屋企咋，你呢？」
「我？我本來打算同你落機舖打兩舖三國既，不過你話返屋企，咁算啦。」
「啊，我冇所謂既，可以打完兩舖先返屋企都得，你係咪想去先？」
「我冇所謂呀，去唔去都得，睇你啦。」
「我都冇所謂，去又得，唔去又得。」
「我都係，可以去又可以唔去。」
「我都係冇所謂喎……」
「我真係冇所謂喎……」
之後架LIFT落到大堂，至於呢兩個戇直少年究景有冇去到機舖打兩舖三國，咁我就唔知喇。
原來當兩個冇所謂既人撞埋一齊，可以好麻煩。

另外有好多人口口聲聲話冇所謂，其實就好有所謂。

「你想食咩呀？」「冇所謂呀，你決定哎。」
「咁不如食PIZZA。」「PIZZA熱氣喎。」
「咁食茶餐廳。」「咁污穢…」
「咁食日本野哎」「我今日唔想食生野喎」
「咁你想食咩呀？」「冇所謂呀，你決定哎。」
真係想一巴車過去。

我其實都係一個冇咩所謂既人，朋友約食飯，除非果期熱氣，唔想食炸野，或者打得太多邊爐，唔想再去，我會預早講我唔想食既野，否則我通常都係冇咩所謂，朋友想去邊度食就邊度食。不過曾經都有試過一大班人都冇所謂，等到出到黎見到面，都唔知去邊度食，企係條街都成粒鐘都決定唔到去邊度食。

我諗好多人都鍾意同冇所謂人相處，貪佢地咩都冇所謂，容易相處。至於冇所謂既人反而會想同有所謂有意見既人相處多D，否則兩個甚至一班冇所謂既人撞埋一齊，就會發生搭LIFT事件都企街事件。

其實冇所謂人點解咩都冇所謂既呢？其中一個原因係佢地唔想諗野，唯有咩都冇所謂，如果佢地唔想諗野但又有所謂既話，就會變左個單去邊食飯事件，係咁係度BAN人既意見，但自己一個意見都唔提出，好鬼乞人憎。

自己都分別遇過真心冇所謂既人，把口話冇所謂，但其實有所謂既人，把口話冇所謂，但心裡有所謂但又唔出聲既人，同埋咩都有所謂，咩都要話事既人。漸漸地我唔再係一個一面倒冇所謂既人，我開始學習係唔同情況分別飾演唔同角色：係冇所謂人堆中話下事，係鍾意話事既人中就冇所謂，係把口話冇所謂，但其實有所謂既人中，就扮有所謂引佢，然後佢講咩都話冇所謂等等。

講真果句，每個人都有愛恨喜惡，冇可能咩都冇所謂，如果佢真係話咩都冇所謂，只不過係佢想收埋自己既喜惡，想去遷就你，令你開心。但當佢去到某個臨界點，發覺唔可以再收埋自己既喜惡既時候，咁就會一發不可收拾。有時表示一下自己既情感，話俾人知你想點，其實係有助雙方既了解，就算你真係咩都冇所謂，你都可以首先講下自己想點架，講完你都可以繼續冇所謂，但唔好口話冇所謂，實則自己不斷啞忍，咁樣實在太唔健康啦。

得閒問下自己，係咪真係冇所謂先。