攝記〈上〉

上星期四晚約左mix column既另一作者周偉昭係尖東食飯，我依時六點放工就落去噴水池meet佢，行到果到，發現起左個stage，好似有表演咁，同時見到阿昭係度周圍望下望下，好似想老笠咁。我走埋去拍佢順便問下佢呢度發生咩事。
「今日會係呢度舉行閃耀尖東25載亮燈儀式嘛，你身為mix column既作者，你冇睇mix column咩，我前日講左架啦！」阿昭好似有d慶咁。
「你知啦，自從我將佢交左俾你之後，我好少上去架喇，你咪怪我啦。」拿拿聲耍個冧先。
「得啦得啦，廢話少說，今日約你食飯，順便叫埋你一齊幫手影下呢個亮燈儀式既盛況架。」只見阿昭一路講一路拎部相機出黎 – 一部200萬像素既數碼相機！！！
「嘩！你部陳年舊機，得200萬像素，仲衰過我部電話喎，影埋去見到豆豉咋喎。」佢果部相機已經係幾年前既產品，真係擺係街都唔會有人偷。
「鬼叫無能站長無能又孤寒咩，買部好d都話冇錢。」鬼咩，無能站長搞左個網咁耐，斗零都未收過，有鬼錢拎出黎upgrade d 器材咩。
「喂喂，你有冇帶咭片？」阿昭無啦啦問我。
「有又點冇又點呀？」唔知佢想搞乜。
「你睇下果邊，我見到d記者行過去放低張咭片話自己係記者就可以入去採訪喎，我地又試下哎。」阿昭兩眼發光咁，鬼咩，佢一向想做記者想到發燒，如果唔係都唔會無條件幫無能站長打理果個mix column啦。
「唔係下話，你講真架？」我都未講完，阿昭已經亦步亦趨咁走去招待處。
「我地話晒都係mix-blog既記者喎，你唔係青下話！」話係咁話，但我地得果部cheap cheap相機，行埋行咪俾d真正記者笑。
「你好，我地係一個網站既記者，想入去影相採訪，呢張係我地既咭片。」我都未及反應，阿昭已經拉左我埋去，仲拎埋咭片出黎話想入去。
我唯有硬著…頭皮，扮晒陣定，扮晒老手咁，笑笑口咁猛咁和應阿昭所講，其實我心不知幾驚，鬼咩，俾人reject好鬼瘀架嘛。
我見個職員望望張咭片，之後pass左俾另一個應該係大粒d既職員，可能佢自己都話唔到事。
果個大粒職員望望咭片，望望我地，再望望咭片，就問我地：「咁你地d影相器材呢？」
阿昭唔知食左咩，反應突然快左咁多：「啊！我地仲係一個幾新既網站，所以未有d重型既器材，得部相機放左係袋入面。」阿昭講既時候彬彬有禮，態度誠懇，同佢平時個樣簡直大相逕庭，呢條友假起上黎真係幾假。
就係咁，我地突破左防守網，直闖入記者區。
個記者區距離個stage都幾遠，我地前面係一排觀眾席，只見d嘉賓來來往往咁走去拎野食，一班記者大佬就set好晒d器材，等緊儀式開幕。我同阿昭搵到個冇咩人既位〈果日記者人數都係得二三十〉企係度等。
「阿昭，你睇下人地d器材，部部都勁野喎，我地果部相機……拎出黎怕唔怕俾人笑架？」人地set晒腳架，長短鏡有齊，冇一個好似我地咁，拎部觀光相機…
「所以我咪唔拎出黎住囉，等個儀式開始左先拎出黎，到時人人都望住個台，鬼有人理我地咩。」哈！阿昭有時都幾古惑喎。
等左冇耐，聽到司儀開始講野，話個儀式正式開始，一班記者大佬隨即歸位，準備好相機，並且一路叫d觀眾：「坐低啦，d位係坐架，唔係放野食架！」「快d坐啦，咪阻住晒啦！」原來做記者係咁樣既。