相聚

剛剛和一位中學同學相聚了幾個小時，他明天又要返回加拿大了。

九七問題影響得我們這一代十分深遠，過半數的中學同學都因此移民他鄉，今次一別，起碼三年後先會再見，到時又唔知大家會變成點。記得佢中四走左之後，一直都冇再返過黎，直到2002年5月。好記得係2002年5月，因為果年適逢韓日世界盃，佢5月返黎，6月返番加拿大，然後就到世界盃，因此印象特別深刻。

記得當年佢返黎既時候，一班朋友都好開心，而且七年冇見過，大家都變左唔少，佢竟然變成蘇民峰咁既樣，梳左條辮，同以前形象完全唔同。果個月基本上一有時間就同佢去玩，去赤柱，上山頂，睇戲，食許留山。果個月食許留山既次數仲多過我之前廿幾年所食既，所以而家佢每次返黎，都會諗起許留山，都要同佢再食一次許留山。

2002年之後，佢返黎既次數多左，可能期間有幾個好朋友結婚請飲，佢就順便返黎賀一賀。但今次返左去之後，呢兩三年都好難再見，雖然話有錢有時間就飛過去探佢，但要有錢有時間都唔係易事。

希望呢三年大家都努力，期望大家再聚既日子！