想當年〈一〉

近日係圖書館借左少爺占廣播劇少說〈八王子〉返屋企睇，個故仔的背景係講九十年代，十分適合我呢d係九十年代成長既人睇，因為小說入面所講既野，九成我都經歷過。好似果時興四大天王，個個男仔剪郭富城頭、跳對你愛不完，暑假睇〈不再少年時〉、〈淘氣雙子星〉、〈beyond放暑假〉，又會追睇黎明天地線廣告，又會抽龍珠卡同yes卡。睇下睇下，突然心血來潮，走去搵番d舊相睇。

我d舊相放左係騎樓書檯既櫃筒，呢張書檯我已經好耐冇用過，以前當哥哥仲係讀緊書、一齊住既時候，我同佢係同房，佢就用房入面張書檯，我就用騎樓出面張書檯。講起騎樓果個讀書位，所有回憶又返晒黎。

騎樓位既好處係遠離電視，廳裡既電視聲傳唔到出黎，但坐出面既慘況就係果位係冬凍夏熱。冬天坐係出面溫書，d風風ba ba聲咁吹入黎，真係騎樓再低兩三度。夏天因為開冷氣既關係，出面熱到成個焗爐咁，所以夏天時唯有搬返入廳做功課同溫書，同時要抵受電視既魔力。直至哥哥畢左業之後，我先至係大學year 2開始，逐步進佔房既書檯。

講開讀書，原來係好細個開始，我已經養成聽收音既習慣，仲要係經常一路聽一路溫書。由初初逢星期六聽軟硬老人院開始，聽收音機漸漸成為習慣。果時開始已經聽商業二台，係唔知邊個介紹我知話港台都有個節目叫週末祥麒倫邦〈由阮兆祥、王書麒、溫兆倫、陳國邦主持〉，聽落好似又幾好笑，另外就係聽三個寂寞的心，正所謂哪個少男不多情，哪個少女不懷春嘛。仲有蘭茜夫人劇場都追架，有時聽唔到，仲會問同學借番餅cassette黎聽，果時我最鍾意聽戀愛1/2，夏崇哲同孔尚雪，個名又靚，果兩首主題曲〈未完的小說、你是我的1/2〉又好聽，後來仲有續集叫戀愛後1/2添。但朋友就鍾意聽初戀無限次呀，我心不死呀同埋向愛情出發多d。

考會考期間，我都係一路溫書一路聽收音機架，果時日日四五點搭車出花園街自修書溫書時，就成日聽到由蘭茜、julie同亞limosa主持果個乜鬼橙遊戲。當然晚晚夜蘭人靜時，一個人係騎樓溫書時就更加會聽深夜既播歌節目啦，好似商台既一切從音樂開始，港台既輕談淺唱不夜天同新城既是夜不是夜，就係咁果時聽埋聽埋好多歌，而家有時聽番就會諗番起果時寒窗苦讀既情況。

講左咁耐都未講我到我舊時d相，而家都夜喇，下次再講。