聽見......便

摘錄自Beach Bit Bitch「聽見......便」的四句說話：

女朋友聽見男朋友話「我地都係埋一齊咁耐....」便知道對方想分手
男朋友聽見女朋友話「我地都係埋一齊咁耐....」便知道對方想結婚
太太聽見丈夫說「夜d番，約左舊同學聚會」便會覺得丈夫有古惑
丈夫聽見太太說「夜d番，約左舊同學聚會」便會覺得應該要爭取時間去古惑

情人Happy Birthday

再度凝望你 咀邊輕帶笑微微
對你說聲一生都想你
柔情全沒顧忌 令世間變開心地
一切呼吸都只為你

是你一天一天不經意地
為我增添增添一絲趣味
情人步進我的心屝 靜裡思憶因你起
請准我許我陪伴你 渡過一切事與非

無窮一分一刻都思想你
傾我一輩子心機
今生今世亦會記起
衷心祝你　在這天HAPPY BIRTHDAY

祝妳生日快樂，我會盡我努力，令妳每日都過得開心愉快。

無間食府營業中

無間三子，化身成菜閒、撈撈、應棍，為大家食盡東南西北，令你回味無窮！

無間食府地址：
http://biggutsdotnet.blogspot.com/

這麼近 那麼遠

人與人的關係，是否只有遠近之分？或是可以似遠還近？

人與人相處，相對無言，是心照不宣，還是無話再講？

本地波

近月先後去了旺角場及香港大球場欣賞本地甲組足球聯賽， 記得香港足球曾經在九十年代風光一時，南華、東方、快譯通等，都是當時的勁旅，每次對賽都吸引數以千計球迷入場，而我則會守在電視機前看直播，期待程度相等於現在看英超勁旅對賽一樣。可是，不知何年何月何日開始，電視台減少直播，香港人不再入場看香港足球，香港球隊吸引力直線下降，我亦放棄了香港足球多年，不但沒有再看僅餘的直播賽事，就連報紙上的香港足球消息也不再留意。直到今年，南華再次以千萬大軍姿態組班再戰本地聯賽，令本地波再次興旺起來，入場人數比前幾年有顯著上升，即使球賽質素依然有待改進〈親身欣賞過兩賽比賽，不論球員技術、組織、戰術等實在不足〉，但香港人再次樂意入場支持本地波，的確的一個好兆頭，期望香港足球能慢慢再次步向光榮之路，衝出亞洲，挑戰世界！
旺角場，晨曦vs流浪


大球場，南華vs晨曦

英超夢

圖片︰/www.premierleague.com

昨晚，發了一個英超夢：

車路士vs唔知邊隊〈唔記得左邊隊〉，賽事進入最後十分鐘，仍然係唔知邊隊領先緊。係呢個時候，唔知邊隊換入左後備球員 -- 我 --入場。我唔係球隊既主力，今次係首次落場，所以一落場就要爭取表現。一入場首先交左球靚波俾隊友，可惜佢失之交臂。後來見到洛賓〈好記得係洛賓〉係邊線推進，我一個攝位將佢腳下球偷走，洛賓好無奈，唯有拉我衫，我被拉衫後，唯有攤大手以表被侵犯，但球證竟然視若無睹，我只能為之氣結。

比賽進入尾聲，我係前場引球推進，洛賓從後追我，但速度不及我〈哇哈哈〉，唯有再次施以拉衫，我雖然俾佢拉住件衫，但依然奮力推進，但球證一直唔吹罰，我氣憤下唯有轉身同洛賓嘈，並發生推撞，但球證走過黎，竟向我出示紅牌！有無搞錯！我俾人侵犯但竟然趕我出場！即使不願意，但我唯有慢慢步入更衣室，係更衣室同隊友訴苦。就係呢個時候，我夢醒了！

從來無想過有機會可以踢英超，但昨晚竟然可以一嘗英超滋味，雖然唔知踢邊隊，但已如願足矣......

星期日黃昏症候群

上星期聽《架勢堂》，森美講起自己從小患了星期日黃昏症候群，此病病徵是每到星期日的黃昏，情緒會顯著變得低落，嚴重者甚至會感到食欲不振、頭暈等。

就我來說，每個星期日晚上，心情總會變得低落，雖然不至於會感到食欲不振、頭暈，但無論做甚麼都會沒精打彩，若果當晚沒有足球賽事可看的話，病情還會更為嚴重。究其原因，都是因為星期一又要返工所賜。「唉，聽日又要返工...」這些說話總會在假期的最後一晚浮現，曾經試過在假期的第一天已不由自主地想到「唉，放完呢幾日假又要返工...」連假期還沒開始便已想到再返工的苦況，多諷刺。

此病唯一治療方法就是找一份自己喜愛的工作，跟著以後每個星期日晚上，心裡只想到：「好野，聽日又可以返工喇！」

離開打機的習慣

好消息！近日終於成功離開打機的習摜！

過去幾年，一直沉迷於PC版的Winning Eleven，縱使這隻過期遊戲〈04年版，堅尼仲係曼聯〉已十分過期，但由於只要一開電腦，再插起那個USB手制，就可以開始模擬足球世界之中，不用像PS2般，每次打機都要將PS2駁電視那樣麻煩，而且躲於房內打機又不會阻礙家人睇電視，所以這幾年一直都有打PC版Winning的習慣，每次短則半小時，長則一至兩小時，縱使已經先後勝出所有盃賽及聯賽，但仍然沒完沒了的打打打。近日終於使用最弱的球隊，由master league的乙組打起，直至升班到甲組，再係同一季內勇奪三料冠軍〈聯賽、盃賽及歐聯〉，至此，真的完完全全打到無可再打了。

過去一個星期，真的沒有再打這個遊戲，時間突然多了，雖然多了的時間也未必能好好利用，但少了一樣浪費時間的玩意也至少是件好事吧。

不愉快經歷

睇波本來係好開心，但撞正係唔好既地方睇，就真係貼錢買難受喇。

上星期六英超早場熱刺vs利物浦，作為熱刺球迷當然唔會錯過啦。果日行經荃灣銀龍餐廳〈荃灣眾安街43-45號〉，見到佢成塊黑板棟係樓下，寫晒今晚有咩波睇，好似一間專為睇波而設既餐廳咁，所以決定上去睇波順便食飯。唔上由至可，一上把幾火... 上到一樓見到一個大廳，sorry，唔係呢度。再上二樓，見到一間一間房，心諗唔係俾間房我睇波唔好死下話，點知真係，但係送到兩件麻甩佬！但係見個位對正部電視機，諗住睇波o者，冇所謂啦，就決定幫襯。好喇，就黎開波喇，坐係我後面果兩個佬係咁大聲大聲咁講波，一個買左利記羸3比1，一個die hard利記fans，我作為熱刺球迷自不然唔會同佢兩個講野。佢兩個嘈之巴幣咁，係咁大大聲係度講戰術呀，呢場點踢呀咁，好似間房得佢兩個人咁，駛唔駛理下人地既感受呢？不過算喇，我忍耐力好高既，而且又叫左野食，忍你！

好啦，終於開波喇，個利記fans好識做，好大聲咁講話：「唔好嘈，開波喇！」。心諗終於可以安安靜靜咁睇波啦，點知十五秒後，個條友又係度大大聲聲：「左邊！麥克干沙利斯，過一個！傳中，古治，哎！」「好！謝拉特，懷斯，比拿美！射~~~~~~~~~~~頂！」「你知唔知有好多球會叫謝拉特轉會但佢都唔肯走哎，因為佢話：『我係利物浦大既！』」「點解古治又叫古積特又叫古積...」整個半場四十五分鐘就係俾佢係度嘈住晒，我相信換左第二個唔好老脾既應該打狗左佢。下半場我諗唔駛我點講啦，大家都知道情況只會更差，尤其利記入左波之後，結果我係輸緊兩粒既時候決定埋單走人。

唔計我黑仔遇到d咁既人，呢間銀龍d野又唔好食，睇波環境又差，位又唔夠，我見到好多人上黎睇兩睇就走左，呢間野夠膽死棟個版話俾人聽上面有波睇！所以我係絕對唔會再去呢間咁既餐廳睇波喇，不過如果你係利物浦fans，即管上去搵個條友傾波，我相信佢係果度既熟客。

最後我想話我對利物浦fans係無敵意，只係覺得果條友好不知所謂！

Blog tag terrorism!!

Blog tag terrorism from 小碧



1.OS為?
Windows XP

2.這台是你的個人電腦？
是，又如何？

3.這張桌布是什麼?
我和我以前的女朋友，靚嗎﹖

4.更換桌布的頻率高嗎?
從前高頻，現在低頻

5.桌面上有幾多個ICON?
好難講，可升可跌

6.一堆檔案和捷徑放得亂七八糟的桌面，你看得下去嗎?
有問題嗎？

7.沒有什麼堅持點?
部腦好似有問題，堅持不到

8.有為了填這份接力, 還特地整理一下嗎?
有，將自己整靚仔左

9.請再傳給5個「我想看看他的桌面」的人。
Forgotten Futurist /小花子之家 /商場求生誌 /刁民公園

汪汪！

想識我？give me your phone number....汪汪！

走出谷底

谷底的日子已成過去，現在已無暇傷春悲秋，手頭上有多個projects需要完成，在公在私都需要加倍努力，這次相信是最接近成功的一次，希望07年會有一番新景象。

加油！努力！the best is yet to come!

谷底

近日，可算是我在谷底的日子，萬事不順，先有希望落空，後有身體出現毛病，身心皆處於極差的狀態。

由上星期五關始，整個人不知去了哪裡，對任何事皆提不起勁，連平日喜歡做的打機、睇波都不想做，星期六晚十點鐘已上床休息。由於胃痛關係，本打算早點休息一會，然後起身睇深夜的足球賽，誰知胃痛難當，徹夜難眠，大好假期，就這樣虛度。本以為休息了兩天，星期一可以重拾狀態，但胃痛過後竟然又搞肚痛，可謂禍不單行。但身體上的毛病可以用藥物治理，心病卻還需心藥醫。

經過多次的屢敗屢戰、屢敗屢戰.....身心真的有點疲倦，縱使知道面前尚有出路，但經過一次一次的行錯路，有時真的不想再走下去，就這樣停在路口，不用再行錯路，不是更好嗎？

害怕失敗？

自問並非甚麼世外高人，看破紅塵，但承受失敗的能力還是有的，只是可恨的並非失敗的結果，而是實踐不到的苦楚。

一直相信做了後悔比不做而後悔好〈這信念可能與從前一些錯誤決定有關〉，雖然有點像歪理，但每遇到需要抉擇做與不做時，總會選擇做了才算。但選擇了做並不代表真的會做，這就是關鍵所在。過往幾年，自己擁有大大小小的想法，朋友也提過各式各樣的建議，念頭初起時，大家總是充滿希望，滿懷自信，認為離成功日子不遠矣。然後大家著手找資料、開會等等，可是一個月過了、兩個月過了、半年過了，仍然停留在找資料階段，最後淪為胎死腹中、不了了之。雖然做了結果可能很失敗，甚至比沒做輸得更慘，但在做的過程當中，總不會一點得著也沒有吧？失敗會教訓你下次要小心，不要重蹈覆轍，如果未嘗過失敗，又怎知成功是如此可貴？但，失敗的滋味是甚麼？很苦嗎？哈，我連嘗試失敗的資格也沒有。

實踐不來的原因很多，如懶惰、貪於逸樂、前景不明、缺乏自信、時不我予、貪新忘舊、失去動力、未打先輸….等等一堆藉口，一次又一次埋沒自己曾擁有過的自信。時間不等人，你有你虛度光陰，它有它日月如梭，日子久了，就連當初的一點點想法也不願再多想，最後只有陷於萬劫不復之地，日復日、年復年地過著行屍走肉的生活。

失敗並不可怕，未曾經歷失敗還更可怕。

精彩演出

一連兩日，看了兩個精彩的演出，現在和大家分享一下。

詹sir互動教室PIP
嚴格來說這不是一個演出，其實似係一個大型workshop，由詹瑞文教學。係短短兩小時內，詹sir和現場觀眾進行幾個練習〈其實似遊戲多d〉，又邀請觀眾上台一齊玩，係玩既過程中講解如何享受失敗〈EYF，Enjoy Your Failure〉，培養幽默感等等，最記得他講過無論做任何事，盡量去享受做的過程，才會做得好。

如果大家欣賞詹sir平時係電影演出的話，呢個workshop絕對不會令你失望。係每個練習過程中，都帶俾你很多歡樂，加上詹sir轉數高、反應快，能夠即時因應現場觀眾既反應而作出應對，配合他獨一無二的形體動作，真係十分好笑，離場時更覺得笑到牙較軟。

參加完這次教室後，除了笑足兩個鐘外，現在每當遇到不如意時，總會嘗試享受失敗，令自己快樂一點。

二十出頭〈復刻版〉
這個由「三角關係」劇團演出的舞台劇，已經是第七度公演。這個劇是描述一個二十出頭的男人由小學時代，直至大學畢業的成長過程，當中以一段追女仔既故事貫穿全劇。

整個故事以七十年代出生，八十、九十年代成長作為背景，因此假如你是廿字頭的話，一定對劇中的一事一物十分熟悉，好像玉郎漫畫、新人張學友、乜乜夫人信箱、啟德機場送機、電台訴心聲、ICQ等等，這些舊事加上演員精彩既演繹，令整個劇笑聲不絕，還有大量拍手位，甚至看後回頭想到當中的情節，都會不禁笑了出來。 現場還見到河國榮先生、羅冠蘭小姐來欣賞。

這個劇團所演出的舞台劇都是以笑為主，上年曾經欣賞過「快樂無罪4唔斷氣」，係一個年度大事回顧劇，但都係令你笑不籠嘴的。今年十二月將會上演「快樂無罪Give me Five」，如果想開開心心笑足一百分鐘的話，我推薦大家可以去欣賞，詳情可去以下網址睇睇：http://www.trinitytheatre.org/

Forever Grasshopper

週一看過草蜢06演唱會，套用黃興桂金句：有今生，無來世！

看過很多香港歌手的演唱會，如陳奕迅、容祖兒、王菲、郭富城、李克勤等等，這次草蜢演唱會是我看過最精彩的一個演唱會。整個演唱會的rundown很簡單，快歌慢歌傾計快歌慢歌傾計安歌再安歌散場，但90%以上的歌曲都是耳熟能詳，當音樂響起兩粒音，心中已不禁叫出：失樂園！永遠愛著你！忘情森巴舞！Lonely.........

多節快歌medley〈其中一節更長達三十分鐘〉，帶動了整個紅館的氣氛，不單止坐貴飛的觀眾起身一齊跳，連坐山頂位的觀眾每一位都起身揮動bong bong棒，跟著拍子跳足整個medley，整個紅館隨即陷入瘋狂狀態。三子的快歌固然精彩，但慢歌一樣窩心，多首經典慢歌相信會令一眾二十至三十的聽眾聽出耳油，勾起不少舊日的回憶。

正如草蜢在演唱會裡說，十年後已不知道還有沒有足夠的體力再開一次演唱會，因此十分慶幸可以欣賞到這個演唱會，多謝草蜢帶給我們一個難忘的晚上。

開學禮

自從畢業後，九月一日對我來說已毫無意義。

但是，每年的九月一日，仍然會想起讀書的日子。記得數年前的某一天，哥哥問我覺得現在比較生活得開心還是讀書的日子開心，當時我說讀書時較開心，哥哥說這是因為我現在工作得不開心，因此會有這樣的選擇。

過去的日子只能回味，活在當下才是實際，未來開心與否仍然可以掌握在自己手裡，希望有一天哥哥再問我同一條問題時，我會毫不考慮說：現在！

至於讀書時既開心日子，就由劉明幫我延續下去吧。

希望

今天是2006年8月31日，是懷有希望的一天。

希望者，即曾經歷失望，但機會再臨，再次懷有希望，希望不斷累積，終有一日達成。

今天是2006年8月31日，是眾多希望的其中一天，但尚未達成。

08歐洲國家盃外圍賽

世界盃剛完了不久，08歐洲國家盃外圍賽又殺到埋身，由本星期六開始，直到明年11月，歐洲各國又要為十四個出線席位打生打死，好戲連場。

08歐國盃將會由瑞士及奧地利合辦，而外圍賽將分成七個小組，每組頭兩名直接進身08年既決賽週。上屆決賽週，我既愛隊葡萄牙藉主場之利，一直殺入決賽，可惜係決賽飲恨於悶蛋希臘腳下，傷透我既心。到了08歐國盃，相信葡萄牙突破外圍賽出線將不是難事，希望葡萄牙可以係迪高、C朗既帶領下，能夠為國取得首個大賽錦標啦。

係外圍賽開始前，我嘗試預測下邊支球隊可以取得出線資格。

(組別：首名、次名)
A組：葡萄牙、賽爾維亞
B組：意大利、法國
C組：挪威、土耳其
D組：德國、愛爾蘭
E組：克羅地亞、英格蘭
F組：西班牙、瑞典
G組：荷蘭、羅馬利亞

一本垃圾

近期全城關注阿嬌遭偷拍事件，而涉案既雜誌係嗅名遠播既一本便利。實不相瞞，我曾經都係呢本雜誌既長期讀者，睇住呢本雜誌由年青人潮流刊物演變成今日既狗仔偷拍垃圾雜誌，真係感慨萬分。

想當年一本便利係隨壹週刊附送，後來讀者多了，變成獨立出版，每本售價兩元。日子有功，讀者愈來愈多，雜誌質素愈來愈好，售價亦相應提升到五元，而我亦都係此時加入成為讀者。當時雜誌既方針係以報導潮流產物為主，輔以一些時事熱話、明星專訪、最新娛樂資訊，十分符合年青人既口味，這個方針一直維持了好一段時間，雖然期間售價不斷上升，八元、十元、十二元，但我依然對它不離不棄。後來可能因為同類型雜誌東TOUCH既誕生，一本便利開始遠離原來既方針，每期都以性感美女封面以作招來，配以一篇二級半有味報導取悅讀者，而潮流娛樂資訊已變成次要，此時有想過放棄便利轉投東TOUCH既懷抱，但有感支持便利已多年，而且美少女介紹及二級半報導對我來說依然具有一定可看性〈後來知道那些報導全是老作〉，所以依然繼續支持。直到2003年，便利已完全發展成一本咸濕狗仔刊物，對我已完全失去興趣，終於決定不再購買便利，轉買依然維持風格的東TOUCH。至此，與一本便利既情義已告一段落，恩斷義絕。

今天一本便利已變成一本人神共憤既垃圾刊物，真係有點睇住佢大，睇住佢壞既感覺，唉．．．．．．