閱讀習慣

好像由中學開始，已經養成每星期買一本雜誌的習慣，從前買一本便利，後來轉買東touch。買雜誌的目的，主要是在搭地鐵/搭火車/等巴士時消磨時間，但原來消磨的不止是時間......

看了十多年潮流雜誌，我得到甚麼？我得到的是新電影簡介、明星藝人近況、近來時興貨品、新game速報，除此之外，還有甚麼？相反，失去的不止金錢〈十多年，都不是少數目〉，還有閱讀的時間。在家中，有電視電腦，很少會撥出時間，靜靜的坐下看書，因此，在搭車及等車的閱讀時間，已經是絕無僅有的，不應該再隨便浪費了。

由今天起，陪伴我度過搭車等車的，已由東touch變成李天命的《哲道行者》，多謝同事借出書籍〈其實已放在家多時，不好意思〉，希望從中可有所得著。

今天是第二天，可幸將不會有第三天。

第一步

剛好十二點，先和自己說聲生日快樂，今年的生日，是過往廿九個生日中最難忘的，卻也是最難過的。

今晚剛和中學朋友晚餐，一回到家就看見書桌上，放了媽媽給我的利是一封，還寫了祝我生日快樂、身體健康、心想事成，感動得淚水差點奪眶而出，媽媽，多謝你。

在和同學相會之前，由於尚未夠鐘的關係，一個人漫無目的在旺角鬧市走走，想起和同事之間的一些對話，原來從前的一些想法，一些想做的事，似乎都完成不到，突然覺得前景真的一片黑暗，真的想不到前路該如何行，身處鬧市中，身邊卻沒有半點聲音，很迷茫，前所未有過的迷茫。

幸好，在最迷茫之際，明白到即使尚未找到該走的路，尚未知道該做甚麼，但至少，知道甚麼是不該做。

回家後，將整部電腦的遊戲全部uninstall，即使是買了一個星期、曾令我瘋狂玩足一星期的那隻遊戲也一併刪除了，因為我明白在我未找到該走的路之前，我絕不可以再浪費時間在電腦遊戲上，所以由今天開始，2006年11月29日，我不會再玩PS2，不會再打電腦遊戲，將時間用在其他方面上，這是我今年生日向自己許下的承諾。

今晚和朋友對話中，提起睇和富大埔、睇墨攻，原來我滿腦子還是有妳。

今天是第一天。

對不起

你所講既每一句說話都好o岩，我連反博既餘地都冇。
我連自己都照顧唔到，我根本無能力俾到幸福你。
我連挽留既理由都找不到......我既眼淚只可以不斷地流。

我係一個好無用既人，令到你好失望，對唔住。

聖誕燈飾

前幾天回家途中，經過尖東，見到大廈外牆舖滿聖誕燈飾，原來聖誕節又到了！

成爸之路

六十年代的中國，是個十分保守的國家，人生大事乃父母之命，媒妁之言，自由戀愛可是遙不可及的事。成爸與成媽的結合，就是在毫無感情基礎下發生。

成爸一家五兄弟，雖然在中山市稱得上為大戶之家，但當年的香港仍然是國內人士趨之若鶩的掘金勝地，家家戶戶的男丁都會選擇偷渡來香港碰碰運氣，期望一朝得志，衣錦還鄉，成爸一家當然也不例外。成爸在家中排行第三，由於二哥不幸在年少時意外去世，成爸便和大哥擔起一家的期望，偷渡來港，創一番事業。

香港地即使遍地黃金，也不是人人有本事拾得到。成爸和大哥初來步到，人生路不熟，要找份工作又談可容易。成爸當過苦力、拉車、打魚，最後在一間染布工廠做染布工人，生活才叫穩定下來，而大哥也憑著少少農藝知識，在一間售賣農藝用品的店舖，當起售貨員來。

當染布工人的生活，可不輕鬆。一星期六天工作，朝七晚十，旺季時更加連僅有的休息日也得用來趕工。國內親友以為身在香港，好食好住乃必然的，實情成爸有苦自己知。

經過多年的異地生活，成爸雖稱不上腰纏萬貫，但有份穩定的職業，收入總比留在國內好得多。半個香港人的成爸，回到中山故鄉顯得特別吃香，根本不愁沒有女人。可恨的是身為半個香港人的成爸，根本沒有多餘時間留在故鄉談情說愛，但為了替成家傳宗接代，父母之命，媒妁之言，總不能抗拒。

三十三歲的成爸，就在四海酒家，認識了廿三歲的成媽。

「妳好！」「你好！」

三個月後，成爸成媽結婚了，但他們說話還不夠十句。

三日後，成爸返回香港工作，但他們說話還不夠廿句。

清明、中秋、春節，就是成爸成媽相見的日子，但他們說話仍然很少，真的，甚至比床第之事還少。成爸和成媽賴以溝通的方法，就是每年數次的床第歡娛，但歡娛的，恐怕只有成爸。

婚後一年，大家姐智美出世，後來智祥、智仁也在往後六年間，來到這個世界。有了孩子的成爸，為了爭更多的金錢，不得不更努力工作，一家團聚的日子更加少之又少。漸漸懂事的智美，有時也會問：「媽媽，爸爸為何不和我們一起生活？」「智美，爸爸為了我們生活好些，在外邊辛勞工作，你要乖啊，幫媽媽照顧弟弟。」智美從小已接受了沒有爸爸的生活是甚麼一回事。成媽就靠著成爸每月的匯款，撫養智仁三姊弟，直至智仁一歲生日那天。

成媽收到成爸的電報，電報說成爸經過多年努力，終於成功申請到成媽和三姊弟搬離故鄉，來到與香港一海之隔的澳門生活？！

「點解？點解會係澳門？」

「移居澳門的手續易辦得多，澳門又有親戚可照顧你們，而且澳門與香港只不過是一海之隔，我每月可來澳門一兩次，總比返中山方便。」

「那就聽你的。」

成媽和三姊弟從此在澳門展開新的生活，誰想到這竟是悲劇的開始。

成智仁

十二月的一個嚴寒晚上，智仁和女朋友芝美，倚在星光大道的欄杆，欣賞著對岸?燦的燈色。臨近聖誕，維港兩岸的大廈都換上了聖誕燈飾，燈火比平日更通明，吸引了一對一對的，互相倚傍，霎是浪漫。

「智仁，我們一起多久？」芝美問智仁時，雙眼一直向前望，沒有望過智仁一眼。

智仁望一望手錶，然後肯定地答：「一共三年零八個月十二日….剛剛夠五個小時！」智仁滿有自信地答，但芝美仍然只是眼望前方。

「唔，是時候了…」芝美似乎欲言又止。

智仁聽到後，便伸手入褲袋，拿出一早準備好的禮物。一份用了足足三十年，去尋找適合的人接收的禮物。智仁悄悄打開盒子，心怕會打草驚蛇，讓芝美察覺到盒子裡裝著既東西。智仁拿出盒子裡面的東西，準備講出心裡面已預備好的說話。

「我們分手吧。」智仁尚未開口，芝美已搶著說出，一直放在心裡面的說話。但，仍然沒有望過智仁一眼。

智仁呆了，戒子從抖震的手中掉到地上，然後滾到岸邊，再噗一聲掉落海中，一切看似挽回不了。

過往三年零八個月十二日五小時的戀愛片段，不斷係腦海裡面重播又重播，直至分手的一刻。

小事三件外傳！神秘之第四件小事！

每年的11月29日，是神秘之第四件小事發生的一天，是小弟之生日也。

每年的生日，媽媽都會在我返學/返工前，為我準備利是一封加雞蛋一隻，作為我的小小生日禮物，媽媽這個傳統習俗已維持多年，但近年媽媽一方面要返工，又要打理家務，已無暇再為我準備了，不過我也希望媽媽多爭取時間休息，這反而是一件更有意義的生日禮物。

好開心係咁多年的生日之中，朋友都會因此而相約一班好友請我食餐飯同我慶祝，及為我送上生日禮物。數一數，算一算，多年來收過的生日禮物也不計其數〈排名由遠至近〉：精鋼鍊製龍珠鐵筆盒兩個、絕版熱刺短袖波衫、李小姐訓身演出之蜜桃精靈不扣鈕系列、人著多過我著adidas波boot、絕版熱刺長袖波衫加波褲、風褸加簽名底褲半打、型仔cap帽、名貴porter袋仔、nike時尚風褸、愛心Jingle Bell、愛心車路士波衫等，如有遺留，請勿見怪。在此再多謝各方好友的禮物！

隨著近年香港經濟的不景氣，朋友間已有共識不再互送生日禮物，此舉避免了不少買禮物的煩惱。雖然禮物欠奉，但每逢生日，朋友依然會相約請我食飯，亦可作為朋友間的聯誼活動，不竟大家畢業後，各自有各自的生活，見面的機會已不多，因此每次相聚都會份外珍惜。

在此祝自己生日快樂之餘，亦祝同是十一月生日的wallace，kwan，fanny，馬仔，emily，catherine生日快樂！

小事三件之最終章

每年踏入十一月，總會有三件小事發生。當小事三件之一及續篇刊出後，引來各方網友激烈討論小事三件之最終章會係點樣既一件事，睇黎係時候開估俾大家知啦，因為呢件個日子好快就到喇......

3.感恩節

每年十一月第四個星期四，是美國感恩節的大日子，今年的感恩節是 11 月23 日。從 1863 年開始, 感恩節已成為美國的公眾假期，假期通常由星期三放工開始，直到星期日為止，合共 4 天。在今天的美國，感恩節已成為全年最重要的一個節日，甚至比聖誕節更受到重視。因為感恩節是傳統的家庭團聚的日子，感恩節期間，散居在他鄉外地的家人，都要趕回家過節，這已經成了全國性的習俗。係感恩節當天，家家戶戶都會準備豐富既晚餐，與家人共享天倫，當中火雞已成為感恩節必備既食物。

雖然香港沒有感恩節這個節日，但願大家能懷有一顆感恩之心，感激待你好的人，寬恕待你差的人，世界自然更美好。

NO......W!!

唔知係好消息定壞消息，由下個球季開始，NOW會獨家轉播英超既賽事，以後想睇英超，唯有NOW......

唔知邊年開始，有線奪去英超獨家直播權，要睇英超唯有裝收費既有線電視，當時作為學生既我，又未識搵錢，屋企又唔係有錢，根本承擔唔到每月用幾百蚊黎俾我睇波，所以係中學時代開始，就要承受冇波睇既痛苦，唯有等睇無線間中直播既本地波呀、法國波呀咁，總叫聊勝於無。好彩當時收費電視未咁有財力，所以世界盃歐國盃呢D四年一次既盛事仍然係免費電視台做直播，我就係靠睇呢D大型賽事黎止波癮。但係好不幸，96年歐國盃既直播權竟然俾有線拎左，當時讀緊中六既我，根本冇錢為左睇波而裝有線，果時唯有依靠去朋友屋企睇，或者搵朋友幫我錄低，睇隔夜球賽，真係苦不堪言。好彩無線爭氣，爭番個98世界盃播影權，如果唔係後果真係不敢想像。

後來升左上大學，科大竟然係宿舍裝左有線，我唯有經常星期六一個人返去睇波，順便屈蛇係同學既HALL。有時唔記得叫同學唔好鎖門，睇完波唯有搭番車返屋企，舟車勞頓。直至2000年，剛剛畢業，為左睇00年歐國盃，終於狠下決心，一個月自己嘔百幾蚊裝左有線，自至開始，終於可享受每個週末，舒舒服服安坐家中欣賞英超同其他國家既聯賽。可惜呢個蜜月期，直到近年開始起了變化。

幾年前開始，愈來愈多收費電視開台，有線既龍頭大哥位置開始受到動搖，最明顯係ESPN俾NOW搶左，有線從此失去左歐聯既直播權，好彩前幾年仲有亞視直播，我都可以收看到呢項球會最頂級既賽事。可惜由今年開始，亞視終於連呢個賽事都冇埋，我都曾經因此考慮為此裝埋NOW，但權衡輕重後，最後都係放棄左。但出年有線連英超呢個皇牌都冇埋，想睇英超真係只有裝埋NOW，唉...而家都唔知點算好，棄CABLE取NOW，咁西意德既聯賽又睇唔到，一切不變？但英超又唔可以唔睇，裝晒？冇錢冇位冇插頭.......

你地話點好呢？

小事三件之續篇

每年踏入十一月，總會有三件小事發生。

2. TVB台慶
每年的11月19日，是TVB台慶的大日子，今年已是台慶39週年。 無線電視在慣性收視之下，係普羅大眾經常收看的電視台，因此TVB台慶已變成一年一度的大日子。

記得細個很期待睇一年一度的台慶特備節目：龍鳳呈祥賀台慶，亦即是現在的萬千星輝賀台慶。記得係呢個全年最大型的綜藝節目中，好似係由男女藝員各自表演去爭奪錦旗，後來演變成現在由不同藝員組合表演一個環節，以爭奪萬千星輝大獎。除左表演之外，抽獎環節都係台慶夜必備節目，經常可以睇到一些唔係好紅既藝員一齊爭車奪樓，我諗對一些搵錢少既藝員黎講，呢個真係千載難逢的機會。台慶夜最好睇既一定係趣劇，集合左好多大牌一齊，he 可下喜咁搞下笑，做下d無聊劇，講真確係幾胡鬧，但又係最易出事既時候，仲記得劉華經典既杏加橙同克勤既非法進入女性體內插旗嘛？

唔知由邊年開始，無線學左亞視咁，係台慶搞左個頒獎典禮。開頭覺得真係無咩公信力，但呢幾年開始變成全城既話題，大家都好留意最佳男女主角既新聞，睇下邊個唔妥邊個，邊個串邊個咁，今年更破天荒將頒獎禮從台慶夜拆左出黎搞，而且收視仲唔錯，相信往後都會係咁搞法。

除左台慶夜大搞之外，集合大部份男女歌星既翡翠歌星賀台慶亦都係大家必睇既節目。因為無論大牌細牌，如果想係年尾勁歌金曲上拎番一個半個獎既話，都唔敢唔出席，所以呢個節目曾經製造好多經典場面，最記得係一d唔多出名既歌手，只能係一d間場既medley唱幾句歌，然後全晚就做人肉布景板。但經過多年來一式一樣既做法之後，呢個節目係唔知邊年開始停辦，直至上年至重開，可惜好睇指數亦都大大降低，上年都尚可，今年就真係......

最後係呢度同TVB講聲：TVB，Happy Birthday!!

小事三件之一

每年踏入十一月，總會有三件小事發生。

1. 澳門大賽車
每年十一月中既週六日，澳門都會舉行一年一度既門格蘭披治大賽，今年已經係第五十三屆了。記得細個既時候，每年都好期待澳門賽車，可能細個曾經係澳門住過，所以對此特別有親切感，可惜當時沒有到過現場親身欣賞。之後黎左香港依然有每年睇賽車既習慣，由星期六朝早起身睇電單車賽、房車賽、東望洋賽，睇到星期日既三級方程式賽，其他一切活動都會停止，打機打波都唔去架。

澳門賽車最觸目既係三級方程式，通常每個一級方程式車手都會先由三級方程式開始，而澳門賽道係被喻為最困難既三級方程式街道賽，所以每個車手都以征服呢條賽道為榮。當年冼拿就係呢度稱王，佢既最快圈速紀錄仲保持左好耐添。好記得有一年既三級方程式賽事，係由舒密加激戰夏健倫，當年夏健倫係第一回合係贏左舒密加約兩秒，只要佢係第二回合唔好輸俾舒密加多個兩秒，咁總冠軍就會係夏健倫喇。第二回合去到最尾一圈，夏健倫緊貼住舒密加後面，只要保持呢個距離過終點，夏健倫就會得到總冠軍，但係作為一個車手，又點會甘心係人後面過終點，於是夏健倫嘗試抽頭過舒密加，可惜佢車頭不幸撞到舒密加車尾，仲壞埋車，係最後一圈暗然退出，睇住舒密加過終點成為總冠軍，而佢只有行出跑道，仲流下英雄淚，呢一幕真係好感動，好替夏健倫不值。

唔知邊一屆開始，已經再無睇賽車既熱情，雖然每年十一月都會想起澳門會舉行賽車，而電視台依然有直播，但已經唔會好期待咁坐係電視機前收看，可能有時偶然會開電視會睇到，但都唔會再有心坐定睇。點解兒時好喜愛既體育活動，而家已經再無興趣呢？

相聚

剛剛和一位中學同學相聚了幾個小時，他明天又要返回加拿大了。

九七問題影響得我們這一代十分深遠，過半數的中學同學都因此移民他鄉，今次一別，起碼三年後先會再見，到時又唔知大家會變成點。記得佢中四走左之後，一直都冇再返過黎，直到2002年5月。好記得係2002年5月，因為果年適逢韓日世界盃，佢5月返黎，6月返番加拿大，然後就到世界盃，因此印象特別深刻。

記得當年佢返黎既時候，一班朋友都好開心，而且七年冇見過，大家都變左唔少，佢竟然變成蘇民峰咁既樣，梳左條辮，同以前形象完全唔同。果個月基本上一有時間就同佢去玩，去赤柱，上山頂，睇戲，食許留山。果個月食許留山既次數仲多過我之前廿幾年所食既，所以而家佢每次返黎，都會諗起許留山，都要同佢再食一次許留山。

2002年之後，佢返黎既次數多左，可能期間有幾個好朋友結婚請飲，佢就順便返黎賀一賀。但今次返左去之後，呢兩三年都好難再見，雖然話有錢有時間就飛過去探佢，但要有錢有時間都唔係易事。

希望呢三年大家都努力，期望大家再聚既日子！

聽見......便

摘錄自Beach Bit Bitch「聽見......便」的四句說話：

女朋友聽見男朋友話「我地都係埋一齊咁耐....」便知道對方想分手
男朋友聽見女朋友話「我地都係埋一齊咁耐....」便知道對方想結婚
太太聽見丈夫說「夜d番，約左舊同學聚會」便會覺得丈夫有古惑
丈夫聽見太太說「夜d番，約左舊同學聚會」便會覺得應該要爭取時間去古惑

情人Happy Birthday

再度凝望你 咀邊輕帶笑微微
對你說聲一生都想你
柔情全沒顧忌 令世間變開心地
一切呼吸都只為你

是你一天一天不經意地
為我增添增添一絲趣味
情人步進我的心屝 靜裡思憶因你起
請准我許我陪伴你 渡過一切事與非

無窮一分一刻都思想你
傾我一輩子心機
今生今世亦會記起
衷心祝你　在這天HAPPY BIRTHDAY

祝妳生日快樂，我會盡我努力，令妳每日都過得開心愉快。

無間食府營業中

無間三子，化身成菜閒、撈撈、應棍，為大家食盡東南西北，令你回味無窮！

無間食府地址：
http://biggutsdotnet.blogspot.com/

這麼近 那麼遠

人與人的關係，是否只有遠近之分？或是可以似遠還近？

人與人相處，相對無言，是心照不宣，還是無話再講？

本地波

近月先後去了旺角場及香港大球場欣賞本地甲組足球聯賽， 記得香港足球曾經在九十年代風光一時，南華、東方、快譯通等，都是當時的勁旅，每次對賽都吸引數以千計球迷入場，而我則會守在電視機前看直播，期待程度相等於現在看英超勁旅對賽一樣。可是，不知何年何月何日開始，電視台減少直播，香港人不再入場看香港足球，香港球隊吸引力直線下降，我亦放棄了香港足球多年，不但沒有再看僅餘的直播賽事，就連報紙上的香港足球消息也不再留意。直到今年，南華再次以千萬大軍姿態組班再戰本地聯賽，令本地波再次興旺起來，入場人數比前幾年有顯著上升，即使球賽質素依然有待改進〈親身欣賞過兩賽比賽，不論球員技術、組織、戰術等實在不足〉，但香港人再次樂意入場支持本地波，的確的一個好兆頭，期望香港足球能慢慢再次步向光榮之路，衝出亞洲，挑戰世界！
旺角場，晨曦vs流浪


大球場，南華vs晨曦

英超夢

圖片︰/www.premierleague.com

昨晚，發了一個英超夢：

車路士vs唔知邊隊〈唔記得左邊隊〉，賽事進入最後十分鐘，仍然係唔知邊隊領先緊。係呢個時候，唔知邊隊換入左後備球員 -- 我 --入場。我唔係球隊既主力，今次係首次落場，所以一落場就要爭取表現。一入場首先交左球靚波俾隊友，可惜佢失之交臂。後來見到洛賓〈好記得係洛賓〉係邊線推進，我一個攝位將佢腳下球偷走，洛賓好無奈，唯有拉我衫，我被拉衫後，唯有攤大手以表被侵犯，但球證竟然視若無睹，我只能為之氣結。

比賽進入尾聲，我係前場引球推進，洛賓從後追我，但速度不及我〈哇哈哈〉，唯有再次施以拉衫，我雖然俾佢拉住件衫，但依然奮力推進，但球證一直唔吹罰，我氣憤下唯有轉身同洛賓嘈，並發生推撞，但球證走過黎，竟向我出示紅牌！有無搞錯！我俾人侵犯但竟然趕我出場！即使不願意，但我唯有慢慢步入更衣室，係更衣室同隊友訴苦。就係呢個時候，我夢醒了！

從來無想過有機會可以踢英超，但昨晚竟然可以一嘗英超滋味，雖然唔知踢邊隊，但已如願足矣......

星期日黃昏症候群

上星期聽《架勢堂》，森美講起自己從小患了星期日黃昏症候群，此病病徵是每到星期日的黃昏，情緒會顯著變得低落，嚴重者甚至會感到食欲不振、頭暈等。

就我來說，每個星期日晚上，心情總會變得低落，雖然不至於會感到食欲不振、頭暈，但無論做甚麼都會沒精打彩，若果當晚沒有足球賽事可看的話，病情還會更為嚴重。究其原因，都是因為星期一又要返工所賜。「唉，聽日又要返工...」這些說話總會在假期的最後一晚浮現，曾經試過在假期的第一天已不由自主地想到「唉，放完呢幾日假又要返工...」連假期還沒開始便已想到再返工的苦況，多諷刺。

此病唯一治療方法就是找一份自己喜愛的工作，跟著以後每個星期日晚上，心裡只想到：「好野，聽日又可以返工喇！」

離開打機的習慣

好消息！近日終於成功離開打機的習摜！

過去幾年，一直沉迷於PC版的Winning Eleven，縱使這隻過期遊戲〈04年版，堅尼仲係曼聯〉已十分過期，但由於只要一開電腦，再插起那個USB手制，就可以開始模擬足球世界之中，不用像PS2般，每次打機都要將PS2駁電視那樣麻煩，而且躲於房內打機又不會阻礙家人睇電視，所以這幾年一直都有打PC版Winning的習慣，每次短則半小時，長則一至兩小時，縱使已經先後勝出所有盃賽及聯賽，但仍然沒完沒了的打打打。近日終於使用最弱的球隊，由master league的乙組打起，直至升班到甲組，再係同一季內勇奪三料冠軍〈聯賽、盃賽及歐聯〉，至此，真的完完全全打到無可再打了。

過去一個星期，真的沒有再打這個遊戲，時間突然多了，雖然多了的時間也未必能好好利用，但少了一樣浪費時間的玩意也至少是件好事吧。